مرحبا بكم في مدونة ام ضياء الدين الخاصة بطبخ وحلويات حراير الجلفة ............. وهي تجميعة من المواضيع المشارك بها من قبل عضوات منتدى الجلفة في مجال الطبخ والحلويات ............ فارجو ان تنال اعجابكم..................

الأربعاء، 12 فبراير، 2014

حساء الفطر الفاخر على طريقتي

حساء الفطر الفاخر على طريقتي




مساء الخير خفاشاتي 


جبتلكم وصفة حساء الفطر بعد ماتأكدت أنها غير موجودة في المنتدى تلبية لطلبكن وحتى لو ماطلبتوهاش نحطهالكم بالسيف عليكم ههههههههههههههههههههه 

عندي بزاف منقطعة عن وضع الوصفات لأنو نحب كي نجي نجيب الجديد والمميز  مانحبش نعاود وصفات موجودة في المنتدى ونوعدكم بإذن الله رايحين تشوفو العديد من الوصفات المميزة والجديدة .



للمرة الثانية : مع حساء فرنسي راقي آخر والميزة فيه أنه لذيذ جدا واقتصادي ويحمر الوجه قدام الضياف وتغيير عن المألوف  ,



قبل مانبدى الوصفة حبيت نحطلكم طريقة تنظيف الفطر الباريسي Champignons de Paris بما أنها أيضا غير موجودة هنا في المنتدى باش نضربو عصفورين بحجر واحد  :




الفطر الباريسي يعتبر من أكثر انواع الفطر استعمالا في الطبخ لذا حبيت نعلمكم كيفية تنظيفه خاصة وأنه في هذه الأيام موجود بكثرة في الأسواق وكمية صغيرة منو وهو طازج تعطي بنة رووووووووووووعة للأطباق 
يعجبني بزاف شوفو كيفاش بوبون  ياعمري يهبل 



أولا : ننظف أسفل الساق بقطع الجزء السفلي بشكل أفقي كأننا نبري في قلم بسكين ( نستعمل سكين حاد لأن الفطر وهو طازج اسفنجي )




ثانيا : الفطر ينمو فوق أسطح يعني نظيف بطبيعتو يعني يكفي نغسلوه على خفيف ونستعملوه لكن باش نخدمو خدمة نظيفة نتاع شافات يستحسن نقشروه, يتقشر بمنتهى السهولة ، شوفو الصور :




ثالثا : هذي الخطوة زيادة من عندي :
نجيب ملعقة صغيرة ونبرش غير بالشوية هذاك السواد لأنو الفطر طري ويتقسم بسهولة كي يكون طازج ، ماشي شرط يتنحى كامل المهم نحاول نزيل الطبقة العلوية منو 


رابعا : في إناء مليء بالماء البارد نحط الفطر ونغسله ومانخليهش يطول في الماء فقط خمس دقائق تكفي لأنه أصلا نظيف ثم نقطروه ونقطعوه ونستعملوه مباشرة,


ملاحظة : الفطر لا ينظف مسبقا يعني مباشرة بعد التنظيف يستعمل ,



نأتي الآن لوصفة الحساء اللي هي أصلا ساهلة خلاااااااااااااااااص :


المقادير :

خمس حبات فطر طازج أو علبة فطر معلب يكون شرائح ( خمس حبات فطر طازج شريتهم بعشرة آلاف فقط )
حبة بصل صغيرة مقطعة مكعبات صغااار أو إذا تحبو كيما انا شرائح
ثلاث فصوص ثوم مفروم وممكن كيما انا نحبو شرائح
ملح
فلفل أسود
أربع ملاعق كبيرة فرينة
زوج كيسان حليب كبار
ثلاث كيسان كبار ماء
زوج مكعبات ماجي دجاج
اللي عندها مرق دجاج جاهز تحط ثلاث كيسان بدلا من الماء ومكعبات الماجي
تشكيلة اجبان حسب الذوق ك انا استعملت كامومبير و قرييار و جبن ابيض
زوج ملاعق كبار معمرين مليح زبدة أو مارغارين
أربع ملاعق كرام فراش أو حليب يستحسن يكون بقري كامل الدسم
معدنوس


الطريقة :

أولا : نحط الزبدة في كوكوط تذوب ثم نحط الفطر يتقلى حوالي خمس دقائق ثم نزيد البصل ونقلي مليح حتى يذبل مليح ,
نضيف الثوم ونقلي دقيقة فقط ثم نضيف الفرينة ونحمصها حتى يصبح لونها اشقر,


لاحظو أن الفطر يسود بسرعة ، شوفو الحبة الأخيرة كيفاش بيضاء والحبات اللي قبلها كيفاش رجع لونهم رمادي.







ثانيا : نضيف الحليب والماء ومكعبات الماجي و الفلفل الأسود وقرصة ملح فقط مانكثرش لانو الماجي والأجبان مالحين ,



أعذرو رداءة الصور لأنو نعمل ونصور ويديا موسخين وزيد البخار نتاع الحساء ماخلانيش نصور  .

ثالثا : لما تغلي نضيف الاجبان :
الجبن الأبيض نحطو في صحن ونحط فوقو مرق سخون ونحاول بالشوكة نهرسو مليح ونزيدو للمرق
القرييار نبرشوه في لا راب
الكامومبار نحيلو القشرة البيضاء لانها ماتذوبش في الحساء ونرابيه أو نقطعو صغيييير ونزيدو للحساء


نقص النار على الحساء باش ماينشفش ونغطي الكوكوط دون وضع الصفارة فقط نحط الغطاء ونخليها تغلي حوالي عشرين دقيقة ,

رابعا : كي توجد نضيف الكرام فراش ونخليها تهز الغلية ونطفي ,

خامسا : نذوق الملح إذا تحتاج نزيدوها ملح ,

سادسا : نحط مباشرة رشة زكية من المعدنوس المقطع رقيق ونخلط ( هذي إضافة من عندي أنا )، خليت المعدنوس على الأخير باش يبقى محافظ على لونو والنكهة نتاعو والفوائد نتاعو .




سابعا : يقدم مباشرة مع خبز محمص بالزبدة ( انا ماصبرونيش جاعو  )








تتحصلو في أقل من ساعة على حساء لذيذ وقوامه كريمي ويعجب جميع الاذواق 


ملاحظة : حبيباتي كي بحثت في النت مالقيت حتى وصفة لحساء الفطر فيها أجبان وبقيت مصممة ندير فيه جبن وحبيت نعرف أي نوع يديروه في حساء الفطر وكي يأست وليت قلت ندير من راسي ونحط اللمسة نتاعي فيه لكن حبيت فقط نعلمكم أنه في الأصل بدون أجبان .
أيضا ممكن تستعملو قطعة من الاسكالوب تكون مقطعة رقيقة او تفتتوها بعد الطياب تقليوها مع البصل والفطر وتكملو عادي وفي هذي الحالة نستعمل فقط مكعب واحد ماجي .


أتمنى فعلا جربوه لأنه فعلا يستاهل تعطيوه فرصة مسكين وتذوقوه .


تصبحو على خير 


مع تحياتي  لهومة

1 التعليقات:

غير معرف يقول...

allah ybarek raho yshahi rabi yatik elsaha

إرسال تعليق