مرحبا بكم في مدونة ام ضياء الدين الخاصة بطبخ وحلويات حراير الجلفة ............. وهي تجميعة من المواضيع المشارك بها من قبل عضوات منتدى الجلفة في مجال الطبخ والحلويات ............ فارجو ان تنال اعجابكم..................

الاثنين، 5 مايو 2014

عجينة سحرية لكل انواع المعجنات من اروووع مايكون

السلام عليكم اخواتي
سبق وحطيت وصفة العجينة السحرية لي نعمل بها التشاراك وغيره تجي هايلة
اليوم جبتلكم عجينة سحرية اخرى لكل انواع المعجنات ،هذا العجينة راااااائعة بكل معنى الكلمة بنفس العجينة ممكن نعمل منها خبز الباغيت،البيتزا،البينيي،الدونات،كرواسون مالح وحلو،خبز الهمبورغر،البانيني،خبز التوست،البريوش والقائمة طويلة
اليوم باذن الله نحط الجزء الاول من المعجنات لي عملتهم بنفس العجينة بالخطوات وان شاء الله في الايام القادمة نحط انواع اخرى من المعجنات بنفس العجينة السحرية

مقادير العجينة:

2 كاس فرينة(كاس نتاع 250مل)
ملعقة صغيرة مملؤة جيدا خميرة الخبز
م ك سكر
3م ك حليب غبرة
ملح
30غ زبدة
170مل ماء دافيء
الطريقة:
نخلط جميع المقادير السابقة ماعدا الزبدة ونعجنها جيدا ثم نضيف الزبدة ونعجن حتى تتداخل في العجن
هذا شكلها هنا ضاعفت المقادير




نغطيها ونخليها تختمر حتى يتضاعف حجمها




بعد الاختمار نشكل بها كل انواع المعجنات لي ذكرتهم

1ـكرواسون مالح وحلو

نأخذ كمية من العجينة ونبسطها على صينية حتى يكون شكلها دائري نقطعها على ثمانية



نحشيها حسب الرغبة انا كمية حشيتها فرماج وكمية حشيتها شكولة ونشكلها على شكل كرواسون



نغطيها ونخليها تختمر
بعدها ندهنها بالبيض مع شوية خل يعطيها لمعة
الكرواسون المحشي فرماج دهنته بالبيض ورشيت عليه جلجلان اما المحشي شكولة دهنته بالبيض فقط



ندخلهم يطيبو في فرن يكون مسخن مسبقا وهذا شكلهم
هذا الكرواسون المالح



وهذا الكرواسون الحلو بعد مايبرد نرش عليه السكر الرطب 






هذا شكلهم من الداخل



2ـخبز الباغيت



لتحضير خبز الباغيت سواء بهذا العجينة او غيرها نتبع مايلي
نأخذ كويرة من العجينة نبسطها كما في الصورة



نبسطها على اثنان ونضغط على الاطراف



نعاود نبثنيها في الاتجاه المعاكس ونضغط على الاطراف



نرفع العجين الموجود على الطرفين الى الوسط



نمدد العجين حتى نتحصل على حربوش طويل



انا حطيت في صينية الخاصة بخبز الباغيت ممكن نعمل الصينية العادية



نغطيه ونخليه يختمر بعدها نشكل فوقه خطوط باستعمال سكين حاد وندهنه بالبيض ونرش عليه الجلجلانية



ندخله للفرن يكون مسخن مسبق حتى يطيب وياخذ لون ذهبي



وهذا شكله من الداخل



3ـالدونات
نبسط العجينة ونقطع دوائر كبيرة وفي كل دائرة نقطع دائرة صغيرة نحطهم على ورق الزبدة مرشوش بشوية فرينة ونخليهم يختمرو جيدا هذا سر نجاحهم



نسخن الزيت ونقليهم وكل ما نحط حبة نرمي عليها الزيت حتى تنتفخ
بعد ما تطيب نحطها فوق الورق المطبخ حتى نتخلص من الزيت الزائد
بعد مايبردو نغطسهم في الشكولة واستمتعو ا باحلى دونات اممممم





4ـ لبينيي
نفس طريقة عمل الدونات فقط وهما سخونين نرمدهم في السكر



5ـ البيتزا
يمكن نشكلها دائرة كيما العادة انا هنا شكلتها وردة باستخدام صحن صغير كنوع من التغيير هنا استعملت صينية البيتزا لي قلتلكم عليها تجي مثقوبة من الاسفل



نثقبها ونحط صلصة الطماطم ونزين بالزيتون الاسود والاخضر وندخلها تطيب في فرن سخوووون



بعدما طابت حطيت عليها التون والفرماج رابي طبعا كل اخت تحط واش تحب






6ـ خبز دائري 

نشكل كويرات من العجين بالحجم المرغوب ونبسطها نغطيها ونخليها تختمر بعدها نشكل عليها خطوط وندهنها بصفار البيض مع شوية فقط من الحليب والخل ونرش فوقها السنوج



ندخل الخبز يطيب في فرن يكون مسخن مسبقا حتى ياخذ لون ذهبي جميل وهذا شكله النهائي



عن قرب 
ذ


تم بعون الله الجزء الاول من معجناتي بالعجينة السحرية نتمنى تجربوها لانها فعلا تستحق التجربة وتوفر الوقت لان بنفس العجينة ممكن نعمل انواع من المعجنات 
نتمنى يعجبكم الموضوع ولاتنسوني من صالح الدعاء لي ولاولادي خاصة انهم في فترة الاختبارات ولكن بالمثل
في امان الله 

4 التعليقات:

غير معرف يقول...

ماشاء الله عليك خرجلك

غير معرف يقول...

خبز هائل بارك الله فيك

Unknown يقول...

ردودكم هي الاروع وشكرا لصاحبة الوصفة ام اماني

غير معرف يقول...

أنا جربت هده العجيينة والله روووووووووووووووووووووووووووووعة يعطيك الصحة ام أماني ربي يسترك ويعطيك ماتتمناي

إرسال تعليق