اللبنة الالمشرقية تحضير بيتي

من المعروف أن منطقة الشام و تركيا واليونان معروفين بطبق اللبنة 

ولان لي صديقة سورية تعلمت منها هذه الوصفة وهي جد رائعة كمقبلة مع زيت الزيتون والنعناع او السانوج او الجلجلاناو الزعتر من الاحسن الفلسطيني وهو متوفر بالسوق 
اتمنى تجربوه 
ان تقريبا نتعشى بيها مع كسرة خميرة امممممممممممم 
في رمضان لا تخلو مائدتي منها لانها تساعد على الهضم وتعمل كحامي للمعدة 
تفضلن الطريقة


المقادير
2 لتر من الحليب علبة ياغورت طبيعي
شوية ملح

الطريقة
تحطي على النار حليب يغلي و تخليه يبرد شوية حتى إذا حطيتي صبعك فيه تحملتيه لمدة 10 ثواني

أضيفي اليه الياغورت طبيعي و الملح نصف ملعقة صغيرة و خلطيه مليح.
و غطيه بمنشفة ثقيلة نوعا ما. اتركيه في مكان دافي مدة 7-8 ساعات حتى يروب.الاحسن ليلة كاملة 



بعد ما راب و جمد 




حطيه في قطعة شاش انا خيطت كيس من قماش الشاش خاص لهذا الغرض 
وعلقي الكيس ليلة كاملة يقطر واعملي تحتو صحن ينزل فيه الماء الاصفر اللي يقطر من الكيس ما ترميهش اعجني بيه خميرة كسرة او غرايف راح ايطلعهم روعة 
لازم نستفادو من كل شيئ لا للرمي 
الغد منذاك راح تحصلي على هذه النتيجة 




وهذا شكلها النهائي قدميها مزينة بالنعناع اليابس او الزعتر او السانوج مع زيت الزيتون 

إضغط هنا لرؤية الصورة بحجمها الطبيعي.

او قدميها كما تقدم بالمطاعم السورية 

لبنة خلطيها مع ملعقة عصير ليمون شوية ثوم مرحي 
وحبة خيار مكرفجة او مقطعة قطع صغيرة خلطي الكل وقدميها مه رشة نعنع للي ايحبو روووووووووووووعة 






تقدري تحشي بيها فطائر تجي روعة 
تقدري تقسميها على 3 قسم تحطي فيه سانوج قسم اخر نعناع ناشف قسم زعتر فلسطيني 
ثم شكلي كرات صغيرة قد حبة مشماش اواقل 
حطيهم على ورق المطبخ الماص حتي يتشرب كل الماء الزائد ثم حطي بلارة فيها زيت زيتون للنصف ما تعمريهاش حطي فيهم كرات اللبنة وغطي بزيت ما تخلي حتى حبة معرضة للهواء حتى لا تتعفن اغلقي البلارة وحطيها في الثلاجة وقدمي هذه الكرات على طبق من السلطة او في صحن مع الزيت اللي ترقدوا فيه ملاحضة كي تعودي تشكلي في الكرات ادهني يدك بالزيت باش ما تتلاسقش في يدك 
وقدمي مع خبز عربي او كسرة خميرة 
والله لو تجربيها ما راح تستغني عليها كلها صحة وفوائد 

اخر ملاحظة 
لما نحظر الوصفة بالصيف 
عملية التقطير تكون بالثلاجة ليلة كاملة باش ما تقراصش 
حطي الكيس انتاع الشاش اللي فيه اللبنة في صفاية او كسكاس فوق البرمة باش يقطر فيها او اي وعاء المهم الكيس ايكون بعيد على الماء اللي قطر منو باش ما يعاودش يمتصو 
ان شاء الله فهمتوني 
وانتظر تجاربكم 
ويحيا شغل البيت 
المرة البجاية اذا طال العمر نوريلكم فطاير تركية ولا بالحلام