مرحبا بكم في مدونة ام ضياء الدين الخاصة بطبخ وحلويات حراير الجلفة ............. وهي تجميعة من المواضيع المشارك بها من قبل عضوات منتدى الجلفة في مجال الطبخ والحلويات ............ فارجو ان تنال اعجابكم..................

الاثنين، 13 يناير 2014

بقلاوة بلابات فيلو مورررقة كيما تحبوها

بقلاوة بلابات فيلو مورررقة كيما تحبوها



بسم الله الرحمان الرحيم

نزولا عند طلب الكثير من الاخوات جبتلكم طريقتي في عمل البقلاوة بعجينة الفيلو.
الفرق بين البقلاوة العادية وهذا البقلاوة ان هذا البقلاوة تجي مورقة اكثر لاننا كي نبسطها نعمل بين الطبقات النشاء اما التقليدية نعمل بين الطبقات السمن بعد ما نبسطها.
هذا النوع من البقلاوة ساهلة في تحضيرها والمعروف ان كي نعملها نقسم العجينة الى12 كويرة نفوتها في الماشينة ونعاود نبسطها لكن هذا المرة ان قسمت العجينة الى 6 كويرات كل مانبسط كويرة نطويها على اثنان راح نتحصل على12 طبقة يعني نفس النتيجة وفي وقت اقل هذا الفكرة كنت شفتها في قناة سميرة عجبتني وجربتها اذن دون اطالة نخليكم مع هذا النوع من البقلاوة.







المقادير:

4كيلات فرينة
نصف كيلة سمن
رشة ملح
ماء+ماء الزهر
الحشو :
3كيلات لوز
نصف كيلة سكر عادي
فاني
ماء الزهر
لازمنا ايضا كمية من النشاء لبسط العجينة

للتعسيل :
عسل
للتزيين:
بيستاش


الطريقة:

نذوب السمن ونخليه يبرد

في جفنة نحط الفرينة ورشة ملح ونضيف السمن نبسس الفرينة مع السمن جيدا من بعد نلم العجينة بخليط الماء وماء الزهر حتى نتحصل على عجينة متماسكة ماتكون طرية بزاف ماتكون يابسة.
نقسمها الى 6 كويرات نغطيها بكيس بلاستيكي ونخليها ترتاح.
ممكن نعمل العجينة في الليل وغدوى من ذاك نحضر بها البقلاوة لان كل ما ارتاحت العجينة تساعدنا اكثر.

نرش طاولة العمل بالنشاء
ناخذ الكويرة الاولى ونبسطها بالحلال كما هو موضح في الصورة

://
إضغط هنا لرؤية الصورة بحجمها الطبيعي.


نبسط باقي الكويرات بالحلال كيما عملت مع الاولى ونحط هم فوق بعض ونرش بيناتهم النشاء

http://
إضغط هنا لرؤية الصورة بحجمها الطبيعي.


الان نفوت العجينة بالواحدة في الماشينة نبدا في الرقم2 ثم 4 ثم6 ثم 7
راح نتحصل على شريط طويل ورقيق
نرش طاولة العمل نحط الشريط ونعاود نطبق على اثنان وبهذا نكونو تحصلنا على زوج طبقات هكذا

http://
إضغط هنا لرؤية الصورة بحجمها الطبيعي.


نكمل نفس الخطوات مع باقي الكويرات لي حليناهم بالحلال وكل مرة نطبق الشريط ونحط الاشرطة فوق بعض وكل مرة نرش النشاء بين الطبقات هذي نقطة مهمة حتى نتحصل على التوريق اللازم

http://
إضغط هنا لرؤية الصورة بحجمها الطبيعي.



من بعد نرقق الطبقات بواسطة الحلال حتى نتحصل على طبقة رقيقة كل ماكانت رقيقة يكون احسن حتى ماتجيش البقلاوة معجنة هكذا

http://
إضغط هنا لرؤية الصورة بحجمها الطبيعي.



في هذا الوقت نحضر الحشو نخلط اللوز مع السكر والفاني ونضيف ماء الزهر مالازمش نبلوه بزاف حتى لا يخرج اثناء الطهي

الان ناخذ الصينية لي راح نطيب فيها البقلاوة ونقيس عليها الحجم ونقطع زوج قطع بقياس الصينية انا هنا استعملت صينية صغيرة اذا راح نستعمل صينية كبيرة من البداية نقسم العجينة الى12كويرة
6كويرات نعمل بهم الطبقة السفلية و6طبقات لي بقاو نعمل بهم الطبقة العلوية ونتبع نفس الخطوات

ناخذ الصينية ندهنها بالسمن نحط عجينة الفيلو الاولى ثم نحط الحشو من بعد نحط الطبقة الثانية من عجينة الفيلو
اسمحولي هذا الخطوة نسيت نصورها
بالنسبة للحواف بواسطة سكين ندخل العجينة جيدا حتى لا يحترق الحشو
نقطعو البقلاوة حسب الرغبة انا قطعت مربعات ومستطيلات صغار

http://
إضغط هنا لرؤية الصورة بحجمها الطبيعي.


في هذا الوقت نذوب كمية مليحة من السمن ونفرغ بالملعقة فوق البقلاوة هذا لي يخليها التوريق يظهر
ندخلها لفرن مسخن مسبقا على 180درجة ونخليها تطيب حتى تاخذ لون ذهبي من الاسفل نعاود نشعل من فوق ونخليها تطيب مالازمش نخليها تتحمر فقط اللون الذهبي هكذا

http://
إضغط هنا لرؤية الصورة بحجمها الطبيعي.

وهي سخونة نسقيها بالعسل نضيفلو كمية قليلة فقط من ماء الزهر بالنسبة لكمية العسل ترجع لكمية اللوز المستعمل نعمل نفس الكمية كيما انا هنا صينية صغيرة عملت رطل لوز لازم رطل عسل للتعسيل

http://
إضغط هنا لرؤية الصورة بحجمها الطبيعي.



نخليها عالاقل24ساعة تتشرب العسل من بعد نقطعها ونزينهابالبيستاش ونقدمها وبالصحة والهناء على قلوبكم

http://
إضغط هنا لرؤية الصورة بحجمها الطبيعي.
إضغط هنا لرؤية الصورة بحجمها الطبيعي.

عن قرب شوفو التوريق

http://
إضغط هنا لرؤية الصورة بحجمها الطبيعي.



ان شاء الله تجربوها وتنجحو فيها ولا تنسوني من صالح دعائكن

ملاحظة:

1ـ لي ما عندهاش الماشينة يمكن تستعمل الحلال لكن اكيد النتيجة النهائية بالماشينة احسن لان الطبقات يكونو رقااااق
2ـ ممكن تعويض اللوز بالكوكاو
3ـماننساش في كل مرة نرش النشاء بين الطبقات

تم بحمد الله

3 التعليقات:

غير معرف يقول...

جزاك الله خير سلمت يداك

oum marwane يقول...

الله اسلم لمك وشكرا لصاحبة الوصفة

غير معرف يقول...

لكي مني خالص الدعاء بارك الله فيكي

إرسال تعليق