وصفة نجمة البحر
العجينة
العجينة
الطلية
العجينة
- 3كيلات فرينة
- 1 كيلة سمن و زيدي فايضيها بالزيت
- لافاني
- قرصة ملح
- 1 ملعقة كبيرة سكر غلاص(لكل 1 كيلو فرينة ديري 3 ملاعق أكل سكر غلاص)
- 1 كيلة خليط من ماء + ماء الزهر(تقدري ما تكمليش الكيلة في التحضير حسب نوعية الفرينة)
- 3 كيلات لوز مرحي
- 1 كيلة سكر عادي
- لافاني
- ماء الزهر+ بيض
- شوية قرفة(اختياري)
- 1 ملعقة كبيرة عصير القارس
- 1 ملعقة كبيرة زيت
- 1 ملعقة كبيرة بياض بيض
- لافاني
- 2 ملاعق ماء الزهر
- ماء معدني
- سكر غلاص حسب الحاجة
- ملون (استعملت الأصفر + البوردو)
- عجينة اللوز
- حبيبات فضية
- ملمع غذائي
العجينة
- في اناء خلطي الفرينة+قرصة ملح+لافاني+السكر غلاص جيدا ثم زيدي كمية ليدام(السمن + زيت) و خلطي
- أضيفي الماء+ماء الزهر حتى تتحصلي على عجينة ثم شكلي كور صغار و ديريها في كيس بلاستيكي و خليها ترتاح لساعات تسمى وجديها في الصباح و استعمليها في المساء من الأحسن
- في وعاء خلطي اللوز + لافاني + السكر
- ابداي تزيدي في ماء الزهر و البيض يعني زيدي للحشوة ملعقة من ماء الزهر ثم ملعقة من بيض مضرب و خلطي ثم زيدي ماء الزهر بعدها البيض بالتوالي حتى تتحصلي على عقدة شادة روحها و خليها ترتاح
- حلي العجينة و قطعيها دوائر قد ما تكون العجينة السمك ديالها خشين الحبة تخخرجلك كبيرة و قد ما يكون السمك ديالها رقيق الحبة تخرجلك صغيرة
- شخصيا ندير كور صغيرة و نحلها براحة اليد
- ندير 5 حرابش صغار من الحشوة قد نوى حبات التمر
- نستف الحشوة فوق لعجينة ثم نغلق ملييييحح عليها من كل جهة(5 جهات) و نقلب الحبة و حاولي تتحكمي في الشكل ديالها كما نخدمو لعرايش
- دخليها للفرن تطيب على نار متوسطة
- كي تطيب خرجيها و خليها تبرد تمامااااااااااااااااااااااااا
الطلية
- ديري في كأس قازوز : ملعقة من بياض بيض+ملعقة زيت+ملعقة عصير القارس المصفي+2 ملاعق ماء الزهر و كملي عمري الكأس ديالك بماء معدني(ماء سعيدة) ماشي ماء الحنفية و راكي رايحة تتحصلي على كأس من السوائل
- فرغي الكأس في اناء و خلطي بالفرشيطة و زيدي لافاني
- ابداي تزيدي في سكر غلاص ألي تكوني غربلتيه عدة مرات حتى تتحصلي على الطلية المطلوبة
- زيدي الملون ديالك ألي تكوني حليتيه في ماء الزهر بالشوية حتى تتحصلي على اللون المطلوب
- شخصيا حبيتها باللون الجمبري و درت الأصفر و البردو معا
- كما تقدري ديري الطلية خضراء و لا بيضاء كما تحبي
- أطلي الحبة ديالك و خليها تنشف راهي ما تديش وقت تمتم تنشف
- كي تنشف نحي الزائد من الطلية(ماديريش كما أنا في الصورة كنت مغاولة و حبيت برك نوصل فكرة لصديقة ليا)
- ديري التزيين ديالك بعجينة اللوز كما في الصور التالية
- في الأخير ديري ملمع و قدميها بالصحة و لهنة
- نهار درت انجمة البحر ماما شبعت ضحك قالتلي هذه ماشي نجمة البحر mais هادا قرنيط (أخطوبوط) معجبهاش التشكيل ديالي قالتلي مالازمش تدوي أطراف النجمة على يدك كما لعرايش
- هامليك نجمات البحر تاع ماما ربي يحفظها (صور عندها أكثر من 5 سنين)
- انشاء الله نكون أفدتك أختي سهي و نعرف طولت عليك و على الفحلات بزاااففففف في الشرح و كسرتلكم رأسكم حبيباتي
- بالنسبة للعجينة تقدري ديري أي عجينة معتمدتها و نفس الشئ بالنسبة للحشوة
- الحشوة درتلها البيض يسهلي في التشكيل و يخلي الحبة تاع الحلوة واقفة
- الطلية تحب تغير فيها و طبقي أي طلية تعجبك
1 التعليقات:
ماشاء الله يعطيك الصحة
إرسال تعليق