مدونة ام ضياء الخاصة بطبخ حراير الجلفة: قاطو بالمورانغ بنين

قاطو بالمورانغ بنين

السلام عليكم

قاطو هايل و شباب انا هذه الوصفة اديتها من الفيسبوك و جربتها اليكم المقادير
4 بيض
250غ زبدة
3 ملاعق كبيرة حليب
كأس الا ربع سكر ناعم
فاني
فرينة حسب ما يتلم
1 خميرة الحلويات
1 علبة معجون المشمش
350غ سكر عادي للمورانغ

طريقة التحضير
نفصل صفار البيض عن البياض ونزيدوا الحليب السكر الناعم الفاني عطر اللوز ونخلطوه بيدينا
ذوبوا الزبدة ونخلوها تبرد ونزيدوها للخليط بشوية وحنا نخلطوا

ونزيدوله الفرينة مع الخميرة حتى يتلم ويولي عجينة خفيفة ما نكترولهاش الفرينة خاطر غادي نبسطوها فالسني بيدنا لازم تكون طرية باش تعاونا

نحاولوا قد ما نقدوا نديروها قدقد ماشي جيها عالية وجيها هاودا ونتقبوها بالفرشيطة وندخلوها للفرن 15 حتى 20 دقيقة كل وحدة تعرف الكوشا تاعها

من جهة اخرى نوجدوا المورانغ نضربوا بياض البيض حتى يولي كي الرغوة

ونبقوا نزيدوله اللسكر غير بالشوية ونديرلها عطر اللوز والفاني

و كي نخرجو العجينة من الكوشة نطليها بالكونفتير اي قوط كامل ديريه ثم موغانج فوق الكونفتير

المورانغ بصح كي تكبي المورانغ حاولي توزعيها لاني حطيتها فالوسط ومشيتها والمعجون بقا يمشي معاها وسال لي مع الجوانب

ودردرت فوقها نوادكوكو ودخلتها للكوشة تتحمر من الفوقها نواد كوكو

ملاحظة مين يحمار طفي النار وخليه فالكوشة حتى تبرد باش المورانغ تشد روحا شوية
وطبعا زوقيه كيما تبغي

إضغط هنا لرؤية الصورة بحجمها الطبيعي.